Awal Puasa (serial Kang Dartim karo yu Satem)

Sore-sore bar Sholat Ashar Kang Dartim karo Yu Satem lagi pada geprek neng mburi umah. Kang Dartim lagi ngumbah karo mbersihi iwak munjaer sing tembe dijikot sekang blumbang mburi umah. Yu Satem neng pedhangan nguleg bumbu karo nggodog banyu nggo gawe teh. Klubanan wis rampung digodog gari mbumbuni, godong lembayung, kecipir, gambas, kacang lanjar, welok, kecombrang wis katon temata neng tampah. Bumbu kluban wis diwadaih baskom cilik.

“ Kyeh Yu munjaere wis bersih gari mbumbuni karo nggoreng.” Kang Dartim ngebrukna baskom isi iwak munjaer sing wis bersih neng meja perek pawon.

“ Kesuwun Kang… punten kae banyune wis umeb disorna maring ceret aja kelalen disogi teh. Mbok arep sisan gawe wedhang kopi yaw is neng kono kabeh. Pangapurane tanganku lagi blopot ora teyeng ngladeni.” Yu Satem aweh instruksi kaya komandan.

“ Siap Yu Satem sayangku…” Kang Dartim njawab karo tangane diangkat maring pinggir bathuk posisi hormat. Wong loro pada gemuyu bareng kelawan rasa bombong.

Suasana terang sore akhir wulan Sya’ban wis dadi tradisi ngawali shalat Traweh mengko mbengi neng mushala pada syukuran mangan bareng. Kang Dartim karo Yu Satem wis nyanggupi gawe kluban, nggoreng munjaer karo nyiapna wedhang teh seceret. Perkara kluban karo munjaer tumrape Kang Dartim karo Yu Satem ora owel sebab klubanan gari met neng sawah lan pekarangan ngarep umah, munjaer mung gari njikot neng blumbang mburi umah nggodog wedhang gari ngurubna pawon. Rampung pegaweane kang Dartim leren njagong neng risban ngarep umah sinambi ngenteni kopine madan adem kena disruput.

“ Angger kringete wis kisat rika adus disit Kang, aku ngrampungna nggoreng munjaer.” Yu Satem kanda sekang dapur.

“ Ya…  ngrampungna kopi disit. “ Kang Dartim semaur karo ilang-ileng wit gedhang gebyar sing wis enggal tua limang dina maning kena ditegor nggo gawe medhangan neng mushala bar Traweh.

Rampung medhang kopi Kang Dartim gagiyanan nyawel anduk neng pemean langsung maring sumur bersih-bersih sisan adus keramas sebab ngesuke arep puasa kepengin bersih lahir batin.

Ora let suwe Yu Satem rampung nggoreng munjaer, diwadaih baskom di jejerna karo klubanan lan ceret isi wedhang pokoke wis siap gari nyeeeng. Yu Satem nyiapna Sarung, peci, sajadah, tasbih cumawis neng amben sedurunge Kang Dartim rampung adus. Mukena, sajadah, gamis sing arep dingo dewek ya wis disiapna ora keri duwit sing arep nggo ngisi kotak amal.

Sawise kang Dartim rampung adus Yu Satem langsung age-age adus keramas bersih-bersih kelawan niat ngesuk arep mulai puasa sewulan nutug. Rampung adus dandan Yu Satem mburu kang Dartim sing wis lagi njagong neng risban ngarep umah langsung njagong neng jejere.

“ Kang … ngesuk mulai puasa, aku njaluk ngampurane rika mbok aku akeh salaeh kurang open, kurang anggone ngladeni rika. Aku njaluk pangapurane sing gede.” Yu satem nyalami nggegem karo ngambung tangane kang Dartim kelawan mrebes mili karo mingseg-mingseg nahan nangis.

“ Aku ya semono uga, selawase bareng akeh salaeh lan mbok anggone menuhi kebutuhane rika kurang sing dikarepna ya pangapurane.” Kang Dartim nyemauri karo mripate mrebeng ora bisa nahan luh sing arep pada. Wong loro pada njaluk ngapura lan aweh ngapura kelawan ikhlas lan bombong.

Sendekala wis mulai kegambar neng langit sing wis mulai nyemburat warna kuning semu abang. Kebo, sapi, wedus wis pada bali kandange, manuk wis pada bali maring susueh Kampret wis mulai metu sekang panggonane kanggo nggolet pangan, cenggeret esih saur-sauran, suara gasir wis mulai rame,. Alam wis mulai pengalihan sekang awan maring wengi.

Kang Dartim mlaku nyangking ceret neng tangan tengen lan baskom isi munjaer neng tangan kiwe. Neng jejere Yu Satem nggawa baskom isi kluban lengkap sebumbune. Suara bedug wis mulai ditabuh pertanda mulai arep puasa Ramadhan.

_Ajibarang, 1 Ramadhan 1440 H_